На Рэспубліканскую дошку Гонару прапанавана занесці 39 пераможцаў спаборніцтва 2007 года

Прэзідыум Савета Міністраў Беларусі адобрыў сёння на чарговым пасяджэнні праект указа "Аб занясенні на Рэспубліканскую дошку Гонару пераможцаў спаборніцтва 2007 года". Пасяджэнне прайшло пад старшынствам Прэм'ер-міністра Сяргея Сідорскага. Як адзначыў міністр эканомікі Мікалай Зайчанка, вылучэнне кандыдатаў на дошку Гонару ў Беларусі праходзіць ужо дзевяты раз. Асноўнымі крытэрыямі з'яўляюцца выкананне прагнозных паказчыкаў сацыяльна-эканамічнага развіцця, захаванне працоўнай і выканальніцкай дысцыпліны.

Акрамя таго, прадпрыемствы не павінны карыстацца дзяржаўнай падтрымкай. За 2007 год вылучаны кандыдаты па ўсіх намінацыях, акрамя абласцей, таму што ні адна вобласць не выканала заданне па развіццю аграпрамысловага комплексу.

Пераможцы вызначаны ў 11 намінацыях. Як адзначыў Мікалай Зайчанка, з 39 месц запоўнена 38. Першае месца сярод раёнаў планавалася аддаць Лепельскаму раёну Віцебскай вобласці. Але гэта кандыдатура адклікана Віцебскім аблвыканкамам у сувязі з заўвагамі, якія паступілі ад Камітэта дзяржкантролю. Гэту намінацыю прапанавана запоўніць іншым прэтэндэнтам - Мінскім мэблевым цэнтрам, які набраў найбольшую колькасць балаў, паведаміў Мікалай Зайчанка. Ён растлумачыў, што палажэннем аб Рэспубліканскай дошцы Гонару дазваляецца пераразмеркаванне не занятых з-за адсутнасці кандыдатур месц на іншую намінацыю. Такім чынам, на дошку Гонару прэтэндуюць цяпер 39 кандыдатур.

У адпаведнасці з праектам Указа на Рэспубліканскую дошку Гонару прапанавана занесці: сярод раёнаў - Смаргонскі (першае месца) і Горацкі (другое месца), сярод гарадоў і раёнаў у гарадах - Гродна (першае месца), Віцебск (другое месца).

Занясенне на Рэспубліканскую дошку Гонару з'яўляецца формай заахвочвання рэгіёнаў і арганізацый, якія дасягнулі найлепшых вынікаў у сацыяльна-эканамічным развіцці, у павышэнні эфектыўнасці вытворчасці, арганізацыі і стымуляванні працы.

У рэспубліканскім суботніку 19 красавіка чакаецца ўдзел больш як 5 млн. чалавек

У рэспубліканскім суботніку 19 красавіка, як чакаецца, прымуць удзел больш як 5 млн. чалавек. Аб гэтым паведаміў Намеснік Прэм'ер-міністра Беларусі Аляксандр Косінец сёння на пасяджэнні рабочай групы па падрыхтоўцы і правядзенню суботніка, якую ён узначальвае.

Ён адзначыў, што сёння апошняе арганізацыйнае пасяджэнне, на якім неабходна вызначыць, ці ўсе аб'екты рэспубліканскай, камунальнай і іншых форм уласнасці падрыхтаваны для правядзення гэтага маштабнага мерапрыемства. "Плануецца, што ўдзел у суботніку прымуць больш як 5 млн. грамадзян Беларусі - такой колькасці ўдзельнікаў яшчэ не было", - сказаў Аляксандр Косінец.

Намеснік Прэм'ер-міністра падкрэсліў, што сродкі, заробленыя 19 красавіка, будуць накіраваны на ўмацаванне здароўя дзяцей Беларусі. Так, 50 працэнтаў будзе накіравана на цэнтралізаваную закупку сучасных рэанімабіляў: па два на кожную вобласць і горад Мінск, аднаго - для РНПЦ "Маці і дзіця". Прыкладны кошт аднаго рэанімабіля - Br480 млн. Зношанасць рэанімабіляў у рэспубліцы складае 90 працэнтаў, дадаў Аляксандр Косінец.

Другая палавіна сродкаў застанецца ў распараджэнні аблвыканкамаў і Мінскага гарвыканкама - яны будуць выкарыстоўвацца на набыццё медыцынскай тэхнікі (ультрагукавых апаратаў, рэнтгеналагічнага, лабараторнага і відэаэндаскапічнага абсталявання, абсталявання для лячэння рэцінапатыі неданошаных дзяцей, апаратаў для рэгістрацыі отаакустычнай эмісіі нованароджаных) для дзяржаўных арганізацый аховы здароўя, якія аказваюць медыцынскую дапамогу дзецям. "Усё будзе зроблена для таго, каб у абласных дзіцячых бальніцах дыягнастычнае абсталяванне было на самым сучасным сусветным узроўні, таму што ад гэтага залежаць здароўе і жыццё маленькіх грамадзян нашай краіны", - сказаў Намеснік Прэм'ер-міністра.

Ён адзначыў, што па выніках двух месяцаў 2008 года ў Беларусі ўзровень дзіцячай смяротнасці - адзін з самых нізкіх у свеце. Ён склаў 4,2 праміле, а ў Віцебскай вобласці і Мінску - 2,5-2,7 праміле. "Мы павінны імкнуцца, каб знізіць гэтыя паказчыкі да мінімуму", - падкрэсліў Намеснік Прэм'ер-міністра.

Паводле слоў Аляксандра Косінца, у гэтым годзе на рэспубліканскім суботніку плануецца зарабіць значна больш сродкаў, чым на мінулагоднім. "Чым больш заробім сродкаў, тым больш будзе закуплена абсталявання, тым лепшая будзе матэрыяльна-тэхнічная база аховы здароўя", - сказаў ён, дадаўшы, што суботнік адбудзецца пры любым надвор'і. "Якое б ні было надвор'е, работы хопіць усім", - заўважыў Намеснік Прэм'ер-міністра.

Нагадаем, Урад Беларусі рэкамендаваў органам дзяржкіравання, арганізацыям, мясцовым выканаўчым і распарадчым органам на добраахвотнай аснове правесці 19 красавіка рэспубліканскі суботнік на рабочых месцах. Замест гэтага можна заняцца добраўпарадкаваннем і прывядзеннем у належны стан сквераў, паркаў, іншых зон масавага адпачынку, праезнай часткі вуліц, тратуараў і дваровых тэрыторый. Адпаведнае рашэнне змяшчаецца ў Пастанове Савета Міністраў ад 7 красавіка 2008 года нумар 517. Дакумент прыняты ў сувязі з аб'яўленнем 2008 года Годам здароўя і ў мэтах падтрымкі прапаноў калектываў арганізацый і мясцовых выканаўчых і распарадчых органаў аб правядзенні рэспубліканскага суботніка.