Прэм'ер-міністр Беларусі ўручыў дзяржаўныя ўзнагароды заслужаным людзям краіны

Прэм'ер-міністр Беларусі Сяргей Сідорскі сёння ў будынку Нацыянальнай бібліятэкі Беларусі ўручыў дзяржаўныя ўзнагароды заслужаным людзям краіны. "Не выпадкова гэта ўрачыстае мерапрыемства праходзіць у будынку Нацыянальнай бібліятэкі Беларусі. Нацыянальная бібліятэка стала сімвалам нашай краіны. Сярод узнагароджаных - тыя, хто будаваў бібліятэку, і тыя, хто будзе ў ёй працаваць", - сказаў Сяргей Сідорскі на ўрачыстай цырымоніі ўручэння дзяржаўных узнагарод. Усяго ўзнагароды ўручаны 102 грамадзянам, у асноўным работнікам будаўнічай галіны, якія былі задзейнічаны ва ўзвядзенні будынка Нацыянальнай бібліятэкі, супрацоўнікам бібліятэкі, вучоным.

"Дзякуючы стваральнай працы, высокаму прафесіяналізму такіх людзей эканоміка нашай краіны развіваецца высокімі тэмпамі, расце дабрабыт грамадзян", - падкрэсліў Сяргей Сідорскі. Звяртаючыся да ўзнагароджаных, ён дадаў: "Вашы прафесійныя веды таксама будуць садзейнічаць далейшаму культурнаму развіццю Беларусі".

У прыватнасці, ордэнам Пашаны ўзнагароджаны галоўны інжынер праекта ЗАТ "Белпраектстальканструкцыя" Анатоль Папоў, прафесар кафедры жалезабетонных і мураваных канструкцый БНТУ Цімафей Пецольд, дырэктар НВРУП "Агат-Сістэм" Валерый Сысоеў.

Медаль "За працоўныя заслугі" атрымалі дырэктар ААТ "Спецмантажаўтаматыка" Аляксандр Гембіцкі, намеснік старшыні Мінгарвыканкама Мікалай Ладуцька, дырэктар Нацыянальнай бібліятэкі Беларусі Раман Матульскі і іншыя.

Ганаровае званне "Заслужаны будаўнік Рэспублікі Беларусь" прысвоена галоўнаму тэхнолагу ААТ "Будтрэст нумар 7 "Віктару Бандарэнку, генеральнаму дырэктару ААТ "Белэлектрамантаж" Уладзіміру Корзуну і іншым.

Падзяка Прэзідэнта ўручана генеральнаму дырэктару ЗАТ "Будсвет" Мікалаю Галавачову, першаму намесніку генеральнага дырэктара ААТ "Белсувязьбуд" Міхаілу Бандарэнку і іншым.

Сяргей Сідорскі таксама ўручыў Ганаровую грамату Савета Міністраў Льву Дубовіку, які раней займаў пасаду намесніка старшыні Дзяржстандарту - дырэктара дэпартамента па энергаэфектыўнасці.

Колькасць аперацый па трансплантацыі органаў у Беларусі ў перспектыве павінна павялічыцца да 2 тыс.

У перспектыве ў Беларусі штогод будзе ажыццяўляцца 2 тыс. аперацый па трансплантацыі органаў. Аб гэтым заявіў сёння віцэ-прэм'ер Аляксандр Косінец на нарадзе ў Доме Урада па пытаннях транспланталогіі органаў і тканак, якую ён правёў з урачамі і спецыялістамі ў гэтай сферы.

Як адзначыў Аляксандр Косінец, у краіне на 10 млн. насельніцтва павінна праводзіцца штогод каля 500 аперацый па перасадцы сэрца, 500 - па перасадцы нырак, каля 400 - па перасадцы печані, прыкладна 600 - па перасадцы падстраўнікавай залозы. Такім чынам, у цэлым у Беларусі можа і павінна праводзіцца прыкладна 2 тыс. аперацый па трансплантацыі органаў.

Цяпер, на жаль, іх праводзіцца значна менш. Так, у 2005 годзе ў Беларусі ажыццёўлена 8 перасадак ныркі, у 2006 годзе - 20, у 2007 - 40. 3 сакавіка гэтага года ў Мінску праведзена першая аперацыя па перасадцы печані. "Як бачыце, мы знаходзімся ў самым пачатку развіцця гэтага напрамку", - сказаў Аляксандр Косінец.

"Трэба сямімільнымі крокамі развіваць трансплантацыю сэрца і іншых жыццёва важных органаў і тканак", - сказаў віцэ-прэм'ер.

Ён адзначыў, што развіццё транспланталогіі мае таксама вялікае эканамічнае значэнне. За мяжой кошт такіх аперацый складае $100-300 тыс. Паводле яго слоў, на іх аплату Беларусі "неабходна прыкладна $200-300 млн." у год. "Мы павінны самі выконваць гэтыя аперацыі, а не накіроўваць нашых пацыентаў за мяжу", - лічыць віцэ-прэм'ер. З другога боку, з'явіцца магчымасць пашырыць экспарт медыцынскіх паслуг, дадаў ён.

Аляксандр Косінец паведаміў, што Рэспубліканскі цэнтр трансплантацыі і клетачных біятэхналогій на базе 9-й гарадской клінічнай бальніцы Мінска будзе поўнасцю здадзены ў эксплуатацыю датэрмінова, да 1 ліпеня 2009 года. Цяпер там ідзе шырокамаштабная рэканструкцыя. На гэтыя мэты накіравана Br92 млрд.

Закрануўшы пытанне падрыхтоўкі спецыялістаў для гэтага цэнтра, віцэ-прэм'ер паведаміў: "З гэтай мэтай мы супрацоўнічаем з сусветнымі хірургамі, што дасць магчымасць нашай краіне забяспечыць укараненне гэтых медыцынскіх тэхналогій у Беларусі".

Паводле слоў Аляксандра Косінца, у канцы 2009 - пачатку 2010 года ў Беларусі пачнуць ажыццяўляцца аперацыі па перасадцы сэрца, у 2010 годзе - падстраўнікавай залозы, а таксама комплекс "лёгкія - сэрца". Такім чынам, "гэта будзе штогод больш як 2 тыс. выратаваных жыццяў", падкрэсліў ён.

Віцэ-прэм'ер адзначыў, што ў Беларусі створана нарматыўна-прававая база, якая забяспечвае эфектыўнае развіццё гэтага напрамку. У сакавіку 2007 года быў прыняты закон аб трансплантацыі органаў і тканак. Законам прадугледжваецца міжнародны абмен органамі і тканкамі на бязвыплатнай аснове ў выпадку, калі знойдзены падыходзячыя донар і рэцыпіент. "У гэтым напрамку мы абавязкова будзем шырока супрацоўнічаць з міжнароднымі арганізацыямі", - падкрэсліў намеснік прэм'ер-міністра Беларусі.

Кошт дзесяці аперацый па трансплантацыі органаў складзе ў Беларусі больш як $1,4 млн. – аб гэтым паведаміў сёння на нарадзе галоўны кардыяхірург Міністэрства аховы здароўя Беларусі прафесар Юрый Астроўскі.

У рэспубліцы неабходна паскорыць працэс падрыхтоўкі і выканання аперацый па перасадцы органаў, адзначыў Юрый Астроўскі. Ён назваў неабходны аб'ём фінансавання для правядзення такіх аперацый. На абсталяванне патрэбна $911 тыс., на падрыхтоўку спецыялістаў - $120 тыс., на тэрапію - $421 тыс. Разлікі зроблены зыходзячы з правядзення дзесяці аперацый. У выніку іх кошт складзе каля $1,452 млн.

Паводле слоў Юрыя Астроўскага, у Рэспубліканскага навукова-практычнага цэнтра кардыялогіі ёсць вялікі вопыт па правядзенню аперацый на сэрцы. Таму цэнтру будзе па сілах выканаць і аперацыі па перасадцы сэрца. РНПЦ кардыялогіі ўжо распрацаваў план мерапрыемстваў па падрыхтоўцы трансплантацыі сэрца. Будзе створана база даных рэцыпіентаў, якія знаходзяцца ў лісце чакання. Неабходна таксама набыць розныя віды абсталявання, у тым ліку для спецыяльных даследаванняў, кандыцыяніравання донараў. Фарміруюцца групы ўрачоў для стажыроўкі ў клініках за мяжой, дзе праводзяцца аперацыі па перасадцы органаў. Будзе вывучацца вопыт Чэхіі, Германіі, Расіі, Літвы.

Як адзначыў віцэ-прэм'ер Аляксандр Косінец, "мы будзем праводзіць гэтыя аперацыі не дзеля самога працэсу трансплантацыі". Яны павінны быць эфектыўнымі і рэзультатыўнымі, падкрэсліў ён.

Віцэ-прэм'ер прапанаваў Міністэрству аховы здароўя назначыць Анатоля Уса кіраўніком Рэспубліканскага навукова-практычнага цэнтра транспланталогіі. "Неабходна, каб ён ужо сёння працаваў там, ствараў базу і займаўся сістэмай арганізацыі, кіравання і каардынацыі ўсіх працэсаў", - сказаў Аляксандр Косінец.

На правядзенне першых 10 аперацый па перасадцы органаў спатрэбіцца амаль $1,5 млн. Але ў гэтай суме больш як $1 млн. прыпадае на абсталяванне, якое будзе затым пастаянна дзейнічаць у цэнтры. Гэты праект будзе забяспечаны фінансаваннем. Такім чынам, "створым наймагутны напрамак у медыцыне, які будзе адпавядаць усім міжнародным стандартам", - адзначыў віцэ-прэм'ер.

У ходзе нарады было дадзена даручэнне МНС і МУС аб забеспячэнні цэнтра верталётамі для дастаўкі і забору органаў. "На гэта ў нас павінна быць не больш як 20-30 мінут", - удакладніў Аляксандр Косінец.

Ён таксама паведаміў, што неабходна ствараць банк даных для транспланталогіі. "Але гэта інфармацыя зусім сакрэтная. Банк даных павінен быць закрытым, ён не падлягае апавяшчэнню. У нас пад абаронай знаходзіцца ўсё насельніцтва краіны", - сказаў Аляксандр Косінец. Пры гэтым ён падкрэсліў, што "тут не павінна быць зусім ніякіх калізій у частцы ажыццяўлення ўсіх мерапрыемстваў, а таксама проціпраўных дзеянняў". Транспланталогія - галіна даволі фінансаваёмістая. У сусветнай практыцы ўзнікалі выпадкі правапарушэнняў у гэтай сферы, што нанесла шкоду здароўю і жыццю людзей. Мы гэтага ніколі не дапусцім, падкрэсліў віцэ-прэм'ер.