навіна

ад 19.03.2008

Іншагароднім студэнтам і навучэнцам дзяржустаноў, якія маюць у гэтым патрэбу, будзе аказана матдапамога на праезд

Перапрацоўчыя прадпрыемствы ў пацярпелых ад аварыі на ЧАЭС раёнах павінны аднавіць работу

Аб гэтым заявіў Прэм'ер-міністр Сяргей Сідорскі на пасяджэнні Прэзідыума Савета Міністраў. Кіраўнік беларускага Урада звярнуў увагу на тое, што пры рэалізацыі праграм пераспецыялізацыі ў такіх рэгіёнах "павінен быць раскрыты ўвесь тэхналагічны ланцужок, пачынаючы ад нарыхтоўкі сыравіны і завяршаючы атрыманнем чыстай прадукцыі". Сяргей Сідорскі падкрэсліў, што дзяржава ўкладвае вялікія сродкі (больш як Br625 млрд.) у 2008 годзе на вырашэнне чарнобыльскіх праблем, і гэтыя "грошы павінны даваць аддачу, прадпрыемствы павінны працаваць".

Як паведаміў міністр па надзвычайных сітуацыях Энвер Барыеў, у 2007 годзе праводзіліся мерапрыемствы па пераспецыялізацыі 39 найбольш праблемных па вытворчасці нарматыўна чыстай прадукцыі гаспадарак Гомельскай і Магілёўскай абласцей. У 27 з іх пераспецыялізацыя завершана, забяспечана значная вытворчасць прадукцыі з паніжанай колькасцю радыенуклідаў.

На вырашэнне чарнобыльскіх праблем у бягучым годзе з рэспубліканскага бюджэту плануецца выдзеліць Br625,3 млрд. Аб гэтым паведаміў міністр па надзвычайных сітуацыях Энвер Барыеў. Паводле слоў міністра, у гэтым годзе ў пацярпелых рэгіёнах будзе прадоўжана будаўніцтва аб'ектаў водазабеспячэння насельніцтва якаснай пітной вадой, жылля для спецыялістаў, якія прыбылі на работу ва ўстановы адукацыі, арганізацыі аховы здароўя, сельгасарганізацыі, а таксама жылля для інвалідаў-чарнобыльцаў. Таксама будзе прадоўжана ўзвядзенне дзіцячых лячэбных і прафілактычных устаноў, газіфікацыя індывідуальных жылых дамоў. Усяго на гэтыя мэты плануецца накіраваць Br107,5 млрд.

Плануецца таксама рэалізаваць мерапрыемствы па правядзенню комплексу ахоўных мер у сельскай і лясной гаспадарках, забеспячэнню радыяцыйнай аховы грамадзян, што працуюць на забруджанай тэрыторыі, пастаўцы мінеральных угнаенняў, вапнаванню кіслых глеб, пераспецыялізацыі гаспадарак, размешчаных на забруджанай тэрыторыі. З бюджэту на гэтыя мэты будзе выдзелена Br130,3 млрд.

Для паляпшэння камунальнага і медыцынскага абслугоўвання насельніцтва ў пацярпелых рэгіёнах з бюджэту прадугледжваецца накіраваць Br21,8 млрд.

На падтрыманне асаблівага рэжыму адселеных тэрыторый і прадухіленне несанкцыянаванай дзейнасці на забруджанай радыенуклідамі тэрыторыі будзе выдзелена Br1,3 млрд. На фінансаванне работ па дэзактывацыі сацыяльна значных аб'ектаў, пахаванне будынкаў і адходаў дэзактывацыі, ажыццяўленне рэабілітацыйных мерапрыемстваў, добраўпаракаванне і ўтрыманне могільнікаў радыеактыўных адходаў выдзеляць Br8,3 млрд. Навуковыя даследаванні ў галіне радыяцыйнай абароны насельніцтва будуць прафінасаваны ў аб'ёме Br4,9 млрд.

У 2007 годзе на вырашэнне чарнобыльскіх праблем было накіравана Br632,8 млрд., з якіх Br516,6 млрд. складаюць субвенцыі, перададзеныя ў абласны бюджэт.

Энвер Барыеў звярнуў асаблівую ўвагу на неабходнасць павышэння адказнасці ўсіх выканаўцаў дзяржпраграмы па пераадоленню наступстваў катастрофы на ЧАЭС. "Мы не заўсёды дакладна працуем, не заўсёды аператыўна рэагуем на сітуацыю, ёсць патэнцыял для павышэння эфектыўнасці работы ў пытаннях ліквідацыі наступстваў чарнобыльскай катастрофы", - сказаў міністр.


Прэм'ер-міністр Беларусі сустрэўся з Надзвычайным і Паўнамоцным Паслом Рэспублікі Карэя ў Рэспубліцы Беларусь

Беларусь мае намер развіваць супрацоўніцтва з фінансавымі карпарацыямі Карэі. Аб гэтым заявіў сёння ў Мінску Прэм'ер-міністр Беларусі Сяргей Сідорскі на сустрэчы з Надзвычайным і Паўнамоцным Паслом Рэспублікі Карэя ў Рэспубліцы Беларусь Лі Юн Су.

Як адзначыў Прэм'ер-міністр Беларусі, "на наступным тыдні ў Мінску запланавана яго сустрэча з кіраўніком адной буйной фінансавай кампаніі Карэі". Беларусь і Карэя прадаўжаюць рухаць наперад шэраг цікавых новых праектаў. Размова ідзе аб легкавых аўтамабілях карэйскай кампаніі "Хёндай". Супрацоўніцтва з гэтай кампаніяй абмяркоўвалася ў лістападзе 2007 года ў ходзе візіту ў Карэю Прэм'ер-міністра Беларусі.

Сяргей Сідорскі таксама падкрэсліў важнасць супрацоўніцтва з карэйскай кампаніяй LG. "Мы зацікаўлены выйсці на самую сур'ёзную рэалізацыю праекта з LG у Беларусі, - сказаў кіраўнік беларускага Урада. - Размова ідзе аб пастаўках на "Інтэграл" ВК-панэлей. З улікам выкарыстання беларускіх тэхналогій новая прадукцыя зойме належнае месца ў тэлевізійнай галіне Беларусі".

Ён таксама пазітыўна ацаніў работу з карэйскім бокам і па іншых перспектыўных праектах. Так, плануецца адкрыццё ў бліжэйшы час у Беларусі прадстаўніцтва карэйскага інвестыцыйнага агенцтва "КОТРА".

У снежні 2007 года ў Мінску адкрылася пасольства Рэспублікі Карэя ў Рэспубліцы Беларусь. Сяргей Сідорскі выказаў упэўненасць у тым, што дзейнасць пасла Лі Юн Су будзе сканцэнтравана "на тых дамоўленасцях, якіх мы дасягнулі пры наведванні вашай краіны ў мінулым годзе".

Прэм'ер-міністр таксама адзначыў, што пасля візіту актывізавалася работа бізнесу Карэі ў Беларусі. А навукова-тэхнічныя распрацоўкі Беларусі былі прадстаўлены ў Рэспубліцы Карэя. "Узаемапранікненне бізнесу - залог паспяховага развіцця нашых эканомік. Гэта вельмі важна з улікам існуючага цяпер у свеце іпатэчнага і фінансавага крызісу", - падкрэсліў Сяргей Сідорскі.

"Карэя і Беларусь займаюць пэўнае месца на сусветным рынку ў нішы высокатэхналагічнай прадукцыі. Гэты напрамак мы будзем развіваць у нашым далейшым супрацоўніцтве", - падкрэсліў Сяргей Сідорскі.

Прэзідэнт карэйскай кампаніі LG Electronics наведае Мінск у сакавіку-красавіку бягучага года. Аб гэтым заявіў сёння ў Мінску Прэм'ер-міністр Беларусі Сяргей Сідорскі. Як адзначыў кіраўнік беларускага Урада, Беларусь пачала актыўна супрацоўнічаць з LG з лістапада 2007 года. Цяпер па дамоўленасці з кампаніяй на беларускае НВА "Інтэграл" пастаўляюцца вадкакрышталічныя панэлі. "Гэта наш паспяховы сумесны праект", - падкрэсліў Сяргей Сідорскі.

"Мы зацікаўлены і далей актыўна працаваць з гэтай кампаніяй, у тым ліку і ў напрамку сумеснай вытворчасці бытавой тэхнікі", - падкрэсліў Прэм'ер-міністр Беларусі.

Надзвычайны і Паўнамоцны Пасол Рэспублікі Карэя ў Рэспубліцы Беларусь Лі Юн Су падзякаваў кіраўніку беларускага Урада за сустрэчу. Ён адзначыў, што кіраўніцтва Карэі праяўляе вялікую ўвагу да Беларусі. Пасол высока ацаніў мінулагодні візіт Прэм'ер-міністра Беларусі Сяргея Сідорскага ў Карэю і лічыць яго вельмі плённым.

Тавараабарот паміж Беларуссю і Карэяй у 2007 годзе павялічыўся ў параўнанні з 2006 годам на 66 працэнтаў і склаў $143,668 млн. Экспарт узрос больш як у два разы і перавысіў $18 млн., імпарт - на 61,4 працэнта да $125,634 млн.

Асноўнымі артыкуламі беларускага экспарту ў Паўднёвую Карэю апошнія 3-5 гадоў з'яўляюцца інтэгральныя мікрасхемы, паўправаднікі, калій, поліаміды, штучныя ніці, шкловалакно і шклотканіны, вугляроднае валакно і тканіны, аптычныя і вымяральныя прыборы, лазерная тэхніка, прадукцыя металургіі, падшыпнікі, медыцынскія прыборы.

Найбольш буйныя экспарцёры на карэйскі рынак - НВА "Інтэграл", ЗАТ "Беларуская калійная кампанія" (пастаўкі нерэгулярныя), ААТ "Полацк-Шкловалакно", РУП "БМЗ", РУП "Светлагорскае ВА "Хімвалакно", ААТ "Гродна Хімвалакно", ТАА "Лазерныя і інфармацыйныя тэхналогіі", ТАА "Этон".

У таварнай структуры беларускага экспарту ў Карэю яшчэ больш умацавалася тэндэнцыя апошніх гадоў на карысць навукаёмістай і высокатэхналагічнай прадукцыі: без уліку калію тэмп росту экспарту ў Карэю ў 2007 годзе, паводле афіцыйных даных, склаў 137,1 працэнта.

Пастаўкі з Карэі ў Беларусь (каля 200 таварных пазіцый) прадстаўлены высокатэхналагічнай прадукцыяй. Гэта легкавыя аўтамабілі, прамыя продажы якіх пачаліся з 2006 года; камплектуючыя для электроннай і электрамеханічнай галін, уключаючы электронныя трубкі і ВК-панэлі; сыравіна для хімічнай і лёгкай прамысловасці, сінтэтычныя і штучныя тканіны, рэнтгенаўская і медыцынская апаратура, бытавая тэхніка, камп'ютэрнае і тэлекамунікацыйнае абсталяванне і дэталі. Закупкі тавараў у Карэі ажыццяўляюцца ў асноўным па пазіцыях крытычнага імпарту.

У Беларусі функцыянуе адно беларуска-паўднёвакарэйскае сумеснае прадпрыемства па вытворчасці і продажы тэкстыльнай галантарэі і абутку, а таксама два прадпрыемствы са стопрацэнтным карэйскім капіталам.

У Мінску адкрыты прадстаўніцтвы кампаній LG Electronics, Samsung Electronics (электроніка і бытавая тэхніка), TM-Korea (закупка біметалаў і вырабаў з іх) і Delta Medical (паравыя стэрылізатары і іншая медыцынская тэхніка).

Савет Міністраў Рэспублікі Беларусь