Урад Беларусі дазволіў прадаваць нерэалізаваныя прадукты раслінаводства са стабілізацыйных фондаў харчовых тавараў за межы рэспублікі. Такое рашэнне змешчана ў пастанове Савета Міністраў Беларусі нумар 288 ад 29 сакавіка 2012 года "Аб унясенні дапаўнення і змянення ў некаторыя пастановы Савета Міністраў Рэспублікі Беларусь". Дакумент уносіць папраўкі ў пастановы ўрада ад 24 сакавіка 2008 года нумар 449, а таксама ад 24 чэрвеня 2011 года нумар 840".

Ініцыятарам гэтага рашэння выступіла Міністэрства гандлю. Мэта пастановы – рацыяналізаваць выкарыстанне стабфондаў харчовых тавараў. У дакуменце прадугледжана, што "ў выпадку зніжэння рэалізацыі прадуктаў раслінаводства і значнага павышэння запасаў гэтых прадуктаў у параўнанні з запланаванымі ў графіках штомесячнага выкарыстання аб'ёмаў стабілізацыйных запасаў дапускаецца рэалізацыя прадуктаў раслінаводства са стабілізацыйных фондаў (запасаў) харчовых тавараў за межы Рэспублікі Беларусь". Гэта пастанова ўрада дасць права гандлёвым арганізацыям прадаваць усе існуючыя астаткі ў стабфондах, не дапускаючы псавання сельскагаспадарчай прадукцыі.

Паводле разлікаў спецыялістаў, запасы бульбы і агародніны ў Беларусі дадуць магчымасць стабільна забяспечыць гандлёвыя прадпрыемствы па чэрвень. Астаткі бульбы і агародніны на 30-60 працэнтаў перасягаюць запланаваныя аб'ёмы. У прыватнасці, бульбы ёсць на 34 працэнты больш, капусты – на 52 працэнты, морквы – на 31 працэнт, буракоў – на 37 працэнтаў, цыбулі – на 64 працэнты.

Пастанова ўступае ў сілу пасля яе афіцыйнага апублікавання.​