Аб'ём гандлю Беларусі з Казахстанам стабільна высокі, але краіны могуць дасягнуць большага. Аб гэтым заявіў Прэм'ер-міністр Беларусі Аляксандр Турчын у час перагавораў з Прэм'ер-міністрам Казахстана Алжасам Бекценавым у пашыраным складзе.
"Аб'ём узаемнага гандлю паміж нашымі краінамі стабільна высокі - каля $1 млрд. Паказальна, што ў бягучым годзе расце як беларускі экспарт у Казахстан, так і казахстанскі імпарт у Беларусь. Важна, каб гэта дынаміка захоўвалася. Больш таго, я лічу, што нам пад сілу і больш сур'ёзныя лічбы з улікам патэнцыялу развіцця нашых краін. Думаю, што ў наступную пяцігодку мы павінны для сябе гэту планку істотна павысіць і даказаць, што мы можам дасягнуць яшчэ большага", - сказаў Аляксандр Турчын.
На сённяшніх перагаворах акцэнт зроблены на прадаўжэнні работы па ўмацаванні гандлёва-эканамічных сувязей. Адзін з галоўных прыярытэтаў - супрацоўніцтва ў сферы прамысловасці, асабліва машынабудавання. "На тэрыторыі Казахстана ўжо не першы год працуюць нашы сумесныя прадпрыемствы. Узровень лакалізацыі такі, што гэта ўжо наш сумесны прадукт", - адзначыў Прэм'ер-міністр.
У час афіцыйнага візіту беларускай урадавай дэлегацыі ў Астану абмяркоўваюцца пытанні далейшага ўзаемадзеяння, наладжвання новых сувязей і рэалізацыі перспектыўных праектаў. "Наша супрацоўніцтва не абмяжоўваецца эканомікай і гандлем, а ахоплівае таксама гуманітарную сферу, ёсць сумесныя праекты ў сферы адукацыі, культуры, спорту, турызму. На мой погляд, пашырэнне сувязей менавіта ў гэтых напрамках дасць магчымасць умацаваць фундамент нашых адносін і ўзбагаціць іх змест", - абазначыў кіраўнік беларускага Ўрада.
"Для нас Казахстан з'яўляецца прыярытэтным партнёрам у гандлёвых і эканамічных адносінах, таму ўрад нашай краіны настроены ўсяляк развіваць гэтыя сувязі. Той узровень дыялогу, які склаўся на ўзроўні кіраўнікоў дзяржаў, абавязвае нас дэманстраваць упэўнены рост тавараабароту і далейшае паглыбленне адносін паміж краінамі", - рэзюмаваў Аляксандр Турчын.
Алжас Бекценаў у сваю чаргу адзначыў, што адносіны паміж дзвюма краінамі паступальна развіваюцца. "Упэўнены, што ваш афіцыйны візіт у Казахстан надасць дадатковы імпульс развіццю нашых адносін, умацуе партнёрства паміж нашымі краінамі. Нашы адносіны сапраўды маюць стратэгічны характар, для іх характэрны даверны дыялог на ўсіх узроўнях. Развіваюцца не толькі гандлёва-эканамічныя і інвестыцыйныя сувязі, але і культурна-гуманітарныя. Нашы народы добра ведаюць гісторыю, культуру адзін аднаго. Хацелася б, каб і ў культурна-гуманітарнай сферы нашы сувязі толькі ўмацоўваліся. Думаю, гэта вельмі важна, калі мы гаворым аб доўгатэрміновым характары адносін. Нашы людзі павінны ведаць адзін аднаго, паважаць і цаніць, і гэта сур'ёзны фундамент у тым ліку для эканомікі", - акцэнтаваў ён.
Паводле слоў прэм'ер-міністра Казахстана, тавараабарот паміж дзвюма краінамі ў гэтым годзе радуе. "У нас традыцыйна добра развіваецца прамысловая кааперацыя. Агульны пул сумесных праектаў складае 15 сумесных вытворчасцей. 12 ужо рэалізаваны з агульным аб'ёмам інвестыцый больш як $200 млн. Тры праекты цяпер знаходзяцца на стадыі рэалізацыі. Мы працуем з беларускімі партнёрамі над паглыбленнем лакалізацыі той лінейкі прадукцыі, якая вырабляецца тут, у Казахстане, заўсёды знаходзім узаемаразуменне і канструктыўны падыход да гэтых пытанняў. Сёння будзе прынята дарожная карта па развіцці супрацоўніцтва ў галіне прамысловай кааперацыі ў бліжэйшыя тры гады. Думаю, гэта таксама дасць магчымасць больш прадметна, мэтанакіравана ісці да дасягнення тых мэт, якія мы сабе намецілі. Урад Казахстана гатовы прыкласці ўсе намаганні для таго, каб нашы гандлёва-эканамічныя і іншыя адносіны развіваліся інтэнсіўна і на ўзаемавыгаднай аснове", - падкрэсліў Алжас Бекценаў.
Фота: БЕЛТА
