Беларусь і Кыргызстан у бліжэйшыя гады павінны актывізаваць двухбаковае супрацоўніцтва. Аб гэтым заявіў Прэм'ер-міністр Беларусі Аляксандр Турчын на сустрэчы са старшынёй Кабінета Міністраў - кіраўніком Адміністрацыі Прэзідэнта Кыргызскай Рэспублікі Адылбекам Касымаліевым.
Аляксандр Турчын адзначыў, што гэты афіцыйны візіт - значная падзея ў двухбаковых адносінах. Беларусь і Кыргызстан звязвае доўгатэрміновае партнёрства, заснаванае на моцнай дружбе і ўзаемнай павазе. «Мы, вядома ж, рэгулярна і эфектыўна сустракаемся на пляцоўках інтэграцыйных аб'яднанняў - ЕАЭС і СНД. Асаблівыя надзеі ўскладаем на актывізацыю ўзаемадзеяння ў фармаце ШАС. Шчыра віншуем Кыргызскую Рэспубліку з пераходам старшынства ў гэтай важкай арганізацыі, - адзначыў Аляксандр Турчын. - Тым не менш з улікам нашых саюзніцкіх адносін прапаную ў далейшым паставіць на сістэмную аснову арганізацыю ўзаемных двухбаковых афіцыйных кантактаў».
Асновай беларуска-кыргызскіх адносін з'яўляецца гандлёва-эканамічнае супрацоўніцтва, якое ахоплівае шырокі спектр напрамкаў. Узаемны гандаль дэманструе пазітыўныя тэндэнцыі нават ва ўмовах складанай геапалітычнай абстаноўкі. У 2024 годзе тавараабарот паміж краінамі вырас на больш як 15 працэнтаў. У гэтым годзе тэндэнцыя росту паставак з абодвух бакоў захоўваецца. Прымножыць зададзеныя тэмпы - першарадная задача двухбаковай міжурадавай камісіі па гандлёва-эканамічным супрацоўніцтве, работу якой курыруюць віцэ-прэм'еры.
Як адзначыў Прэм'ер-міністр, Беларусь і Кыргызстан маюць значны патэнцыял для нарошчвання супрацоўніцтва ў такіх ключавых галінах, як машынабудаванне, сельская гаспадарка, інавацыйныя тэхналогіі. Перспектывы бакі бачаць у пашырэнні прамысловай кааперацыі.
На 12-м пасяджэнні камісіі, якое паспяхова прайшло ў Бішкеку ў лістападзе 2024 года, прыняты амбіцыйныя планы па давядзенні ў бліжэйшыя пяць гадоў тавараабароту да паўмільярда долараў. У мэтах дасягнення гэтай высокай планкі рэалізуецца дарожная карта супрацоўніцтва да 2027 года. Сёння падпісана дарожная карта да 2030 года.
«Лакаматывам, безумоўна, з'яўляецца супрацоўніцтва ў прамысловай сферы, у якой найбольш ярка праяўляецца ўзаемадапаўняльнасць нашых эканомік, - адзначыў Аляксандр Турчын. - Беларусь і Кыргызстан маюць значны патэнцыял для нарошчвання супрацоўніцтва ў такіх ключавых галінах, як машынабудаванне, сельская гаспадарка, інавацыйныя тэхналогіі. Аднак мы не павінны рабіць акцэнт толькі на аб'ёмах паставак. Важны і якасны складнік. Перспектывы мы бачым у пашырэнні прамысловай кааперацыі. Гэтыя сферы ў комплексе адкрываюць шырокія магчымасці для сумеснага абмену вопытам і рэалізацыі высокатэхналагічных праектаў, выгадных абодвум бакам. Мы ведаем, што ў вас актыўна будуецца жыллё, узводзяцца інфраструктурныя і дарожныя аб'екты. Удзяляецца ўвага экалогіі».
Беларусь і Кыргызстан рэалізуюць сумесныя праекты, у прыватнасці па зборцы ліфтаў, трансфарматараў. Яны маюць патэнцыял для маштабавання. Наладжана ўзаемадзеянне на міжрэгіянальным узроўні, актыўна развіваюцца бізнес-кантакты. Прыкметнай падзеяй стала правядзенне ў чэрвені бягучага года бізнес-форуму дзелавых колаў Беларусі і Кыргызстана на пляцоўцы выстаўкі «Белагра» у Мінску.
«Практыку правядзення такіх форумаў важна прадоўжыць. У Беларусі створаны сур'ёзны партфель эфектыўных сучасных інструментаў экспартнага фінансавання, працуюць механізмы міжнароднага фінансавага лізінгу, заключаны неабходныя пагадненні Банка развіцця Рэспублікі Беларусь з кыргызскімі банкамі. Хачу прапанаваць нашым кыргызскім сябрам актыўней карыстацца такой магчымасцю для пашырэння сваіх інтарэсаў», - адзначыў Аляксандр Турчын.
Таксама на сустрэчы абмеркавалі гуманітарнае супрацоўніцтва. Усё больш магчымасцей прадастаўляецца маладому пакаленню кыргызстанцаў для атрымання адукацыі ў беларускіх навучальных установах. Пашырэнне сувязей у сферы культуры, спорту і турызму дасць магчымасць умацаваць фундамент адносін і ўзбагаціць іх змест.
«Мы адкрытыя да абмеркавання розных напрамкаў узаемавыгаднага супрацоўніцтва, пашырэння эканамічных сувязей. Упэўнены, што новы імпульс беларуска-кыргызскаму супрацоўніцтву надасць падпісанне пакета дакументаў па выніках нашай сустрэчы», - адзначыў Аляксандр Турчын.