Намеснік Прэм'ер-міністра Юрый Шулейка па выніках нарады ў Кіраўніка дзяржавы аб развіцці Беларускай нацыянальнай біятэхналагічнай карпарацыі (БНБК) расказаў аб эканамічным складніку работы прадпрыемства.
"Дзяржаве ў некалькі заходаў даводзілася аздараўліваць гэта прадпрыемства. Але эканамічныя моманты, якія былі на БНБК, урэгуляваны. Дзяржаўная падтрымка і прынятыя Урадам рашэнні далі магчымасць правільна ўкласці крэдытныя грошы, каб прадпрыемства магло існаваць і выконваць свае абавязацельствы, - сказаў Юрый Шулейка. - Вытворчая праграма выбудоўваецца так, каб адназначна пагашаць абавязацельствы, якія ёсць на прадпрыемстве".
Віцэ-прэм'ер адзначыў, што да Кіраўніка дзяржавы звярталіся за дадатковай падтрымкай, але гэта не звязана з бягучым станам спраў Беларускай нацыянальнай біятэхналагічнай карпарацыі, а датычыцца перспектыў яе далейшага развіцця. "Гэта будзе накіравана на мадэрнізацыю, удасканаленне, пашырэнне наменклатуры на ўжо існуючай базе прадпрыемства", - падкрэсліў ён.
Паводле слоў Намесніка Прэм'ер-міністра, для атрымання гэтых сродкаў яшчэ неабходна падрыхтаваць адпаведныя дакументы: "Кіраўнік дзяржавы або падтрымае, або не падтрымае (выдзяленне сродкаў. - Заўвага). Але высокая верагоднасць, што падтрымае".
Юрый Шулейка назваў Беларускую біятэхналагічную карпарацыю амбіцыйным прадпрыемствам у маштабах краіны. Першыя лінейкі прадукцыі на БНБК сталі вырабляць у 2022 годзе адразу пасля запуску прадпрыемства. Тым не менш, адзначыў віцэ-прэм'ер, біятэхналогіі пастаянна развіваюцца, таму айчынныя спецыялісты ўдасканальваюцца і шукаюць новыя падыходы ў рабоце. "На нарадзе ішла размова ў тым ліку аб будучыні БНБК. Мы вельмі сур'ёзна думаем аб гэтым праекце. Гэта яшчэ адзін крок у будучае для нашай краіны", - упэўнены ён.
