Вельмі важна, каб быў забяспечаны бескантактавы механізм адбору абітурыентаў і была забяспечана справядлівасць. Аб гэтым заявіла Намеснік Прэм'ер-міністра Беларусі Наталля Петкевіч у час наведвання Рэспубліканскага інстытута кантролю ведаў.
Наталля Петкевіч адзначыла, што Кіраўнік дзяржавы ўдзяляе вялікую ўвагу ўступнай кампаніі, і самае галоўнае, што павінна быць забяспечана ў краіне, - справядлівасць. Паводле яе слоў, у гэтым годзе Дзяржаўная камісія пачала працаваць па-новаму - з больш ранніх стадый, а менавіта з правядзення ўніверсітэцкіх алімпіяд. "Гэта дае магчымасць ахапіць увесь перыяд падрыхтоўкі да ўступнай кампаніі, таму што пераможцы гэтых алімпіяд з'яўляюцца той катэгорыяй абітурыентаў, якая залічваецца ў вышэйшыя навучальныя ўстановы без уступных іспытаў, таму трэба забяспечыць справядлівасць, празрыстасць і сумленнасць ужо на гэтых этапах", - сказала Намеснік Прэм'ер-міністра.
Яна праінфармавала, што аналіз правядзення ўніверсітэцкіх алімпіяд выявіў пэўныя недапрацоўкі. "Некаторыя рэктары не зусім сур'ёзна падышлі да гэтага пытання, імкнучыся нешта зрабіць у рамках сваіх ВНУ. Аднак паступленне па выніках алімпіяд - гэта льгота, і пераможцы павінны быць лепшымі за астатніх абітурыентаў. Мы паглядзелі, што пераможцамі становяцца навучэнцы з 50 баламі, гэта значыць, што больш падрыхтаваны абітурыент не зможа стаць студэнтам. Гэта несправядліва. Таму камісія ў гэтай частцы скарэкціравала падыходы да вызначэння прэтэндэнтаў на льготныя месцы, улічваючы, што кожнае такое месца выключае магчымасць паступлення па агульным конкурсе", - канстатавала Наталля Петкевіч.
У РІКВ прайшло штогадовае мерапрыемства напярэдадні выпускных экзаменаў і ўступнай кампаніі - выбарка экзаменацыйных матэрыялаў. У ім прыняў удзел таксама першы намеснік міністра адукацыі Аляксандр Бахановіч. Па кожным з 14 прадметаў было прадэманстравана стварэнне тэставых матэрыялаў.
"Вельмі важна, каб быў забяспечаны бескантактавы механізм адбору абітурыентаў і была забяспечана справядлівасць, - падкрэсліла Наталля Петкевіч. - Тут усе працэсы, звязаныя з фарміраваннем заданняў, іх паступленнем і размеркаваннем механізаваны. Важна, каб на ўсіх стадыях не было магчымасцей для таго, каб хто-небудзь змог паступіць не зусім заслужана. Тыя доўгія гады, на працягу якіх Кіраўнік дзяржавы кантралюе гэты працэс, прынеслі сур'ёзныя вынікі. Сёння мы можам з упэўненасцю сказаць, што справядлівасць ва ўступнай кампаніі забяспечана".
Дырэктар Рэспубліканскага інстытута кантролю ведаў Дзмітрый Міронаў адзначыў, што ўсе заданні, якія выносяцца на цэнтралізаваны экзамен і цэнтралізаванае тэсціраванне, поўнасцю адпавядаюць школьнай праграме.
"Папярэдне міністрам адукацыі зацвярджаюцца адпаведныя спецыфікацыі па прадметах, на падставе якіх мы ўжо распрацоўваем адпаведныя заданні, тэставы матэрыял", - дадаў ён.
