Мэты і задачы, вызначаныя ў праграме сацыяльна-эканамічнага развіцця краіны на пяцігодку, павінны быць рэалістычнымі. Аб гэтым заявіў журналістам Прэм'ер-міністр Аляксандр Турчын па выніках пасяджэння Прэзідыума Усебеларускага народнага сходу, дзе ён дакладваў як старшыня аргкамітэта па падрыхтоўцы і правядзенні наступнага пасяджэння УНС.
Адным з ключавых пытанняў парадку дня сходу, запланаванага на 18-19 снежня, стане зацвярджэнне праграмы сацыяльна-эканамічнага развіцця краіны на пяцігодку. Цяпер гэты дакумент актыўна абмяркоўваецца ў тым ліку з дэлегатамі УНС, і гэтыя дыскусіі прадоўжацца на працягу тыдня. "Ідзе інтэнсіўная работа. Калегі з міністэрстваў, урада сустракаюцца з дэлегатамі УНС. Фармат (такіх сустрэч) - гэта прэзентацыя праграмы, адказы на пытанні дэлегатаў УНС і абмеркаванне іх прапаноў і таго, што неабходна дабавіць у праграму, а што можна рэалізаваць у іншых дакументах", - растлумачыў Аляксандр Турчын.
Прэм'ер-міністр лічыць, што фундаментальных змяненняў у выніку дыскусій не будзе, паколькі дакумент уважліва рыхтаваўся, у тым ліку з улікам маштабных даследаванняў, якія праводзіў Беларускі інстытут стратэгічных даследаванняў."Мы бачым тыя пытанні, якія хвалююць нашых людзей", - адзначыў Аляксандр Турчын.
"Самае галоўнае - каб усе нашы мэты і задачы былі рэалістычныя. Прэм'ер-міністру трэба выходзіць на трыбуну кожны год і дакладваць аб ходзе выканання праграмы сацыяльна-эканамічнага развіцця. Вядома, хацелася б, каб у нас большасць паказчыкаў, параметраў выконвалася. Гэта не проста лічбы. Лічбы дзеля лічбаў нікому не патрэбны. Мы вырашаем канкрэтныя праблемы людзей. Хацелася б, каб за наступную пяцігодку многія пытанні, якія назбіраліся і хвалююць грамадзян, мы маглі калі не на 100 працэнтаў, то, скажам так, у значнай долі вырашыць", - падкрэсліў Аляксандр Турчын.
