БелАЭС не толькі забяспечыла задавальненне попыту на электраэнергію ў краіне, але і надала магутны імпульс павелічэнню яе выкарыстання ў рэальным сектары эканомікі і насельніцтвам. Аб гэтым заявіў Намеснік Прэм'ер-міністра Беларусі Віктар Каранкевіч у час пленарнай сесіі "Ад першай АЭС у Расіі да глабальнага тэхналагічнага лідэрства" на V Кангрэсе маладых вучоных у Сочы.
Віктар Каранкевіч адзначыў, што БелАЭС дазволіла Беларусі адмовіцца ад імпарту электраэнергіі, знізіць залежнасць ад вуглевадароднага паліва, а таксама забяспечыць ужо на момант уводу першага і другога энергаблока задавальненне ўзрастаючай патрэбнасці ў электрычнай энергіі. "За 2024 год аб'ём (спажывання электраэнергіі) перавысіў 43 млрд кВт.гадз. За апошнія 5 гадоў ён узрос на 6 млрд кВт.гадз (амаль на 15 працэнтаў). Атамная станцыя таксама дала імпульс да павелічэння электраспажывання ў іншых, сумежных галінах, якія накіраваны на павышэнне якасці, узроўню, камфорту жыцця. Ён падкрэсліў: сярод гэтых напрамкаў цяплічна-парніковая гаспадарка, што павышае харчовую бяспеку, развіццё электратранспарту (штомесяц у краіне становіцца на 3 тыс. электрамабіляў больш), развіццё майнінгавых ферм, дата-цэнтраў, электра- і цеплазабеспячэнне насельніцтва, а таксама іншыя напрамкі.
Віктар Каранкевіч таксама звярнуў увагу на тое, што ў аснову далейшага развіцця атамнай энергетыкі легла неабходнасць у задавальненні нарастаючай патрэбнасці ў электрычнай энергіі ў доўгатэрміновай перспектыве. "Атамная станцыя - месца прыцягнення маладых спецыялістаў. Ёсць прывабнасць работы на самой АЭС, дзе можна рэалізаваць сябе ў адной з самых высокатэхналагічных галін", - дадаў Віктар Каранкевіч.
